الجزء الاول:
فكرة اروح السوق ..
طبعا بعد هواش في البيت
العنود : ابي اروح الى السوق.
ابراهيم : دوري احد غير يوديك..
العنود : ترك تندم اذا موديتني..
ابراهيم : لا والله وش تبي تسوين يعني..
العنود: بسيطه
بعدها اروح الى اخوي الثاني فيصل..
هيه انا ابي اروح الى السوق وقلت لامي وقالت عادي روح ما عندي مانع
انا ابي منك توديني
فيصل : اقول اطلعي وصكي الباب من وراكي ماني فاضي لك..
العنود : هاااه..شلون يعني<<<مفتشله. .
فيصل : يعني انقلعي كل يوم سوق استحي على وجهك ..
انا اقاطع كلامه : ايه خلاص لا تفلسف علينا اف منك
وبعدها اتحول الى الاخ الثالث محمد
العنود : هيه ابي اجيبها من الاخر تبي توديني الى السوق او لا...!!؟
محمد : اقول خذيها من الاخر بعد. الفلوس الى تبين تضيعينها في السوق اعطينيها لاني محتاج
العنود : يووووووه انا ابيك توديني الى السوق وانت تشحذ مني يا عيشه سبع لعنات
ما معي لك شيء روح تسلف من اخونك المهابيل ما ادري ليه الله بلاني وحطاني عندكم
محمد : اقول
العنود : وش تبي قول
محمد : انقلعي والله اذا مارحتي من قدمي والله بنعله.
العنود: لا لا خلاص اروح
وبعد المحاولات الفاشله في اقناع اخوني اروح الى امي
العنود: يمه كل خواني مايبون يودوني الى السوق
امي : خيرها بغيرها تروحين ان شاء الله بكرى
العنود : لا ابي اروح اليووووم
امي : ااااااه منك خلاص انا اقول لهم
تروح امي الى خوني من شان تقنعهم يودوني الى السوق
وانا اجلس في غرفتي انتظر الخبر السار اسمع هواش تحت الله يستر
حسيت ان امي دمرتهم ورح يوفقون يودوني الى السوق
جلست على السرير مبسوطه وفكر اني اشتري لامي هديه تفرحها
وفكر يا ربي وش اشتري لامي امممم ثوب ..! لا مو ثوب درجها مليان ثياب
طيب ليش مااشتري لها عطر ..! لا لا امي ما يعجبها أي عطر لازم هي تختار
عطرها بنفسها اخاف اشتري لها وما يعجبها ..
و انا افكر وش اشتري لها فجأة فتح الباب بقووة
طبعا محمد يقول : ياملى الوجع وش تبين من السوق.! وليه تفزعين با أمي
يا حبك لشر..
وكان عيونه كلها شرار ..
طبعا انا خفت منه وقلت له انا ماابي اروح الى السوق ابي اروح الى المشغل
زعمي ابي اخفف من عصبيته و زدت الطين بله..
قال لي : وش تقولين والله انك مو صاحيه..
قلت له انا وبخوف : ليه..!!!
هو يقول وناقد علي: الحين المشغل اللي قدام بيتنا مو عاجبتك
العنود : ايه صح والله انك صادق .. تصدق نسيت ان فيه مشغل عندنا.. اقول لك
خلاص مابي اروح الى أي مكان..
محمد : اسمعي امي قالت لي اذا وديت اختك الى السوق راح اعطيك ميتين ريال
وانتِ تدرين اني ادور سلف ..انا اتحرك في السيارة ..
العنود : لا خلاص ماابي اروح الى السوق
محمد : ليه
العنود : من شان ماتعطيك امي ميتين ريال.. ليه تعطيك على راسك ريشه ليه تشرط لك
وانا لا ..انت مو احسن مني بشيء
محمد : اقول اسمعي والله اذا ماجيتي بعد خمس دقائق الى السيارة راح انتف شوشتك
فاااااااهمه ..
وانا بكل فرحه : لا الا شوشتي.. روح انت الى السيارة وانا اتبعك الحين.
طبعا ركبت السيارة قبله..
كان الوقت في العصر كان الجو حلو كثير ..
ركب اخوي السيارة وقال : بسم الله تؤكلت على الله ..هاااه قولي ويين تبيني اوديك.
الى برزان او سماح او وين بضبط..
قلت له : انا ابي اروح الى مشغل
قال لي : بلا سخافه من اليوم حاطه زحمه في البيت في النهايه تقولين مشغل
يلعن ابو بليسك انتِ ما تستحين .. المشغل هذا اللي عند بيتنا مو عاجبك مابينك وبينه الا شبر
انا اقول له : لا مو عاجبني ابي اروح الى مشغل عالمي .. مشغل مرتب نظيف
اذا شافوني يقولون لي اهلا وسهلا ويعطوني اذا دخلت حلاو جالكسي او شىء زين
مو مثل المشغل هذا الخرابه..اذا شافوني كانهم شافو جني ومايقولون لي اهلا..
كان اكبر همي كلمة اهلا وسهلا
محمد : بعذرهم كل يوم انتِ عندهم .. والله انا عاذرهم ما اعرف كيف متحملينك..
العنود: اقول انطم بس ودني الى المشاغل الرقيه اللي في سوق سماح من شان اضرب عصفورين في رضمه (حجر) وحدة.. اتسوق وبعدها اروح الى المشغل..
محمد : ايه خلاص لاتكثرين هرج..
سكتت انا وكمان سكت محمد ..
وفي الطريق وكنا قربين من المشغل ..كنت انا اتلفت يمين ويسار
وفجأة وقلبي توقف من الفزعه
محمد يقول: يااااااااااااااااااااااااابنت ترينك رفعتي ضغطي كانك اول مرة تشوفين حائل
لك اكثر من خمس طعش سنه انتِ به ترينك فضحتي بي ..احسن لك اطلعي من الدريشه..
او اقول وش رايك تجلسين فوق السيارة وتلفتي يمين ويسار..
العنود: بسم الله عليك .. وش عليه فشلتك يا وجه النحس.. من يبي يعرفك اصلا من شان تبي تفتشل.
محمد : أيه ايه يا شاطرة ما احد يعرفني انت بلاك انك ما تعرفيني و انا اخوك مافيه احد في البلد
وما يعرفني ..انا شخص معروف .. انا..
مقاطعه مني : انت حمار يناهق في السيارة وفات المركز التسوق ((سماح سنتر)).
محمد : وعدك في البيت والله اذا مادقيت عظامك ما اكون انا.
طبعا هذا الهوش كانت هوش حقيقيه مو لعب بزران.. والشر بيننا فايح
وقفني اخوي في اخر الشارع كان يعاندني.. لما وصلت السوق ودخلت
وفريت في السوق وفريت الين تعبت واخذ الاشياء التي كنت محتاجه لها
وشريت لامي هديه بسيطه شريت لها عطر كنت ادعو الله انه يعجبها ..
وصعدت الى المشغل.
وكنت افكر كيف اقص شعري ..
ولما دخلت المشغل استقبلتي الحارسه كانت تفتش عن جوالات الكاميراء
انا ماخذة حسابي في البيت وبدلت جوالي لاني ما فكرة اروح الى المشغل الا باخر المطاف..
الحارسة اخذه جوالي .. و انا بدوري قلبي يتفرفر على جوالي ولعن واشتم بقلبي
وعرفت ان ما فيه احلى من المشغل اللي عند بيتنا..عندهم ثقة في الزبائن
دخلت داخل المشغل وشفت بنات كثيرة وحريم وعجز ناس عالم اخذين سرى
طبعا انا عرفت اني ما راح يجي دوري الا بوقت متأخر..
جلست واخذة التكلوج وبدئت اقلب الصفحات يمكن القي قصه حلوة تعجبني..
اقلب الصفحات واقلب و اقلب الين طفشت
رميت المجله من يدي ..
وجلست اشوف و اطالع في الناس ..وقبل ما تدخل اي بنت الى الغرفه كنت
اخذ نظرة شامله عليها يعني ماسح ضوئي..
ولما تطلع اشوف الفرق قبل وبعد..
كنت انصدم تدخل بنت عاديه وتطلع بنت شكل غير..سبحان الله
كنت انا مستغربه مو مستوعبه.. لا نهن يتغيرا ميه وثمانين درجه عن شكلهن الاساسي
وانا جالسه مطيرة عيوني على البنات والمعجزات اللي اشوفها
الا اسمع امرأة عجوز كبيرة بسن تقول لي : كم الساعة يا بنت ..
انا يدي على قلبي و افكر وش مجيب العجوز في المشغل ..!!
و اقول لها : الساعه يا خاله الحين 4:73 دقيقه..
العجوز: يصير خير ان شاء الله..
انا وبكل غباء : وش خيرة حنا مو في المستشفى انت مضيعه المستشفى و انا اقول وش مجيبك هنا.!!
شكلك ياخله خرفتي وضيعتي الطريق
العجوز: اقول يابنت تريني ماني خرفانه انا ادري اني في المشغل والله انه عجيب
تدخل البنت متدهورة وتطلع ملاك..
انا وفي نفسي زين والله في احد ملاحظ النظريه غيري
انا و اقول لها : اقول خاله وش مجيبك هنا لا تقولين تبين تصبغين شعرك
او تحطين حمام بخاري والله تروحين فيها..
يا خاله اذا تبين مساعدة انا في الخدمة ..!!
اذا تبين تصبغين شعرك انصحك بلون الاحمر المخصل في الابيض من شان اذا
شافوك عيالك وزوجك ما يخافون منك راح يظنون اللون الاحمر انه حنى و الابيض شيب ..
اذا تبين تحطين عملية شد انصحك تروحين الى المستشفى..
العجوز تقول لي : الله يغربلك أي صبغه أي شد .. والله انك مخرفه مو انا..
انا جايه هنا من شان بنت بنتي صارت عروس وجبتها هنا من شان نحط لها تعديلات
الله يسعدها ويرزقها . الحين تطلع بنيتي وتشفينها مزيونه
العنود : امين الله يرزقها ويسعدها.. طيب ليش جايه معاها .. والله تعب عليك
العجوز: اكيد تعب وركبي يوجعني من الجلوس على الكرفاجه <<((كنب))
بس اخاف على بنيتي تروح لحاله
وهي بعد تبي تاخذ شوري في قصه شعرها وصبغتها و الاشياء الثانيه...
العنود : اهاااه طيب ليش ماجت امه معاها اقول لك بس لاتزعلين ياخاله اكيد شور
امه احسن مشورتك لانك ماتعرفين وين الله حاطك
العجوز وهي تضحك : لا والله يابنتي ماني بزعلانه عليك لان كلامك صحيح
و انا والله اول مرة ادخل مكان مثل هذا ..اما امه جلست عند عياله الصغر والله اذا
تركتم لحالهم يتضاربون يابعد سبدي هي.
العنود : الله يردها ..
وانا اقول بنفسي اذا جت امه وشافت بنتها وهي متغير كيف يكون ردة فعلها.
وفجأة
وفجأة
شفت انسانه من زمان ما شفتها لي ثلاث سنين ما شفته
هذه البنت كنت اكرهه كثير كان اسمها امل
ماحبيت انها تشوفني مسكت المجله و حطيتها على وجهي بس كانت المجله
ما تخبيني عنها . التفت الى البنت اللي بجنبي كانت تفتش في جريدة ..
انا رميت المجله في حضنها وسحبت منها الجريدة بقوة..
طبعا البنت استغربت من تصرفي السريع وكنت ابتسم لها من الفشله
بس عذري معي ما ابي امل تشوفني
بس حسيت ان الجريدة انكمشه و صارة صغيرة ..!!
انا اذكر الجريدة طويله عريضه الا هذة الجريدة كانها دفتر
لكن للاسف..
سمعت صوت يقول لي : هذه انتِ من زمان ما شفناك والله اشتقنا
انا لما شفتها سبدي و جعتني مو كره فيها بس تذكر ايام زمان.
حسيت ان اليوم كله خطا..
ما اعرف كنت انا سعيدة بشوفتها او متضايقه ..!!؟
لكن جوبتها وقلت : ايه انا وعععع على الدنيا اللي خلتنا نشوف بعض مرة ثانيه..
ما سلمت عليها وهي ما سلمت علي مثل خلق الله
جلست قدامي واخذ تقلب صفحات المجلات ..
انا لما شفتها تذكرة ايام مرحله المتوسطه والابتدائية..